Энергетикалық сусындар соңғы жылдары жасөспірімдер мен жастар арасында кеңінен таралған. Көпшілік оларды сергектік беретін, шаршауды басатын сусын ретінде қабылдайды. Алайда оларды жиі тұтыну денсаулыққа кері әсер етуі мүмкін.

Энергетикалық сусындардың зияны қандай?

Энергетикалық сусындардың құрамында кофеин, қант және ағзаны ынталандыратын басқа да заттар (таурин, гуарана және т.б.) болады.

Оларды шамадан тыс тұтыну:

• жүрек соғуының жиілеуіне;
• қан қысымының жоғарылауына;
• ұйқының бұзылуына;
• мазасыздық пен ашушаңдыққа;
• бас ауруына;
• ағзаның сусыздануына әкелуі мүмкін.

Энергетикалық сусындар әсіресе балаларға, жасөспірімдерге, жүкті әйелдерге және жүрек-қан тамырлары аурулары бар адамдарға қауіпті.

Неліктен энергетикалық сусындарды жиі ішуге болмайды?

Энергетикалық сусын шаршауды жоймайды, тек уақытша басады. Оның әсері өткеннен кейін ағза бұрынғыдан да қатты демалуды қажет етеді.

Мұндай сусындарды жиі тұтыну кофеинге тәуелділікке және ұйқы режимінің бұзылуына себеп болуы мүмкін.

Сергектікті қалай табиғи жолмен сақтауға болады?

Оның орнына:

• жеткілікті ұйықтаңыз;
• күнделікті жеткілікті су ішіңіз;
• дұрыс тамақтаныңыз;
• тұрақты дене белсенділігімен айналысыңыз;
• таза ауада көбірек серуендеңіз.

Денсаулық – дұрыс таңдаудан басталады

Егер өзіңізді үнемі шаршаңқы сезінсеңіз, энергетикалық сусындарға жүгінбеңіз. Оның себебін анықтап, қажет болған жағдайда дәрігерге қаралған дұрыс.

Табиғи сергектік пен салауатты өмір салтын таңдаңыз – бұл денсаулықты сақтаудың ең тиімді жолы.